--^[ ( عيش بالجزر ) ]^--

هالعيش من الأطباق اللي اعشقها .. واااااااايد عجيييييب طعمه .. مادري اشلون اوصفه ..

خليط البصل واليزر مع البهارات من الهيل والزعفران والدارسين والبزار والسنوت .. شي خيالي .. وعشان اشوقكم هذي صورة الطبق ..

بالنسبه للمقادير ..

- حبتين بصل مقطعين صغير ..

- 3 جزرات مبشوره ..
البهارات كانت ..
- 1 ونصف ملعقة صغيره هيل مطحون ..
- نصف ملعقة صغيره بزار (بهارات مخلوطه) ..
- ثلاثة أرباع ملعقة صغيره دارسين مطحون (قرفه) ..
- نص ملعقة صغيرة كمون ..
- كم حبة مسمار (قرنفل) ..
- كم حبة فلفل أسود ..
- عود دارسين ..
- كم خيط زعفران (انا حطيت بالاضافه للزعفران الخيوط شوية زعفران بودره) ..
وطبعاً العيش مغسول .. احنا بعد مانغسله ننقعه في ماي حار ويكون اول الصبح في نفس الوقت اللي طلعنا فيه الدجاج المجمع ونقعناه عشان يفك .. العيش كميته كانت كوبين (احنا نستعمل الmug) ..

 

الطريقه ..
 
- اول شي نحط الجدر على النار ونحط البصل ونخليه يتحمر ..
- بعد ماتحمر البصل نضيف له الجزر المبشور ونقلبه ونخليه لحد مايذبل الجزر ويتغير لونه مع التقليب كل شوي ..

 

 

- بعد مايذبل الجزر نضيف البهارات والماي المطلوب لتسوية العيش انا حطيت على كل كوب عيش كوبين ماي لان نوع العيش اللي استخدمته يستخدم كميه كبيره من الماي وزدت عليه نصف كوب او اقل شوي لاني عملت حساب للماي اللي بيتبخر .. ونخليه شوي يغلي عشان تتجانس المكونات مع بعض ..

- بعدها نشخل العيش ونضيفه للمكونات السابقه ونقلبه ونغطيه ونخليه يستوي ..

 

 

 

- يقدم مع اللحم أو الدياي المشوي ..

¤¦¤ فول بالزبده ¤¦¤

ياصباح الفول المدمس ..


من العنوان الطبق هالمره فول مدمس بالزبده .. طبق سريع ولا اسهل من كده ومقاديره مايبيلها تعب ..

المقادير ..
- علبة فول مدمس ..
- 1 ملقعة طعام زبده ..
- حبة طماطم مقطعه مكعبات صغيره وبقدونس مفروم للزينه ..


الطريقة ..
- نفرغ علبة الفول في طابي (مقلاة) ونهرسها بالهراسه أو بالشوكه ..
- بعد ماهرسنا الفول نحط الزبده ونحطه على النار لحد مايسخن ..
- نحط الفول في الصحن ويزين بالبقدونس والطماطم ..

»•¤•» قاموس البهارات «•¤•«

ساعات نشوف وصفه اجنبية في كتاب .. مجله .. او التلفزيون .. بس مانقدر نسويها لان في بعض الكلمات نحس انها صعبه او مانعرفها .. او ممكن نكون في دوله اجنبية ونبي نوع من البهارات ونبي نسأل عنه في السوبرماركت بس مانقدر عشان مانعرف شنو يسمونه عندهم .. عشان جذي انا حطيت هالموضوع عشان يساعد اللي يبي نوع من انواع البهارات باللغه الاجنبيه ..

فلفل أسود = Black Peppercorn

فلفل أبيض = White peppercorn

مسمار (قرنفل) = Cloves

هيل (حبهان) = Cadamom

سنوت حب (كمون حب) = Cumin seed

يليلان حب (كزبرة ناشفه حب) = Coriander

دارسين (قرفه) = Cinnamon

حلوه (شمر) = Fennel seed

ينسون حب = Anise

بهار حلو = Allspice, Pimento, Jamaican pepper

هيل حبشي أو هيل أسود = Black Cardamom

جوزة الطيب أو جوزة بوّه = Nutmeg

خردل حب = Mustard Seeds

كراويه = Caraway

فلفل بارد مطحون = Paprika

كركم (العقدة الصفراء) = Turmeric

زعفران = Saffron

فلفل حار (شطه) = Red Chili powder

~*¤®§(*§ طبقات الكستر §*)§®¤*~

كنا مسويين عشا بعد رجعوا ابوي وامي من الحج .. وسويت هالحلو .. وهو عبارة عن طبقات كستر .. طبقة مانغو وفراوله .. شكله كان غريب والحمدلله عجب الضيوف ..

المقادير ..
- مقدار من كستر المانغو ..
- مقدار من كستر الفراوله ..


" بالنسبه للكستر طريقة التحضير تختلف من نوع للثاني .. والطريقه تكون مكتوبه على العلبه .. "


الطريقه ..
- بعد ماسويت كستر المانغو .. صبيته في ملال (كاسات) صغيرة (نص المله) .. ونحطه في الثلاجه لحد مايتماسك ..
- بعدها سويت مقدار كستر الفراوله .. طلعت اللي في الثلاجه وصبيت عليه كستر الفراوله ورجعت حطيته في الثلاجه ..


بالنسبه للكستر اللي استعملته هذا شكله :)

°¨¨™¤¦ سلطة الزعتر ¦¤™¨¨°

سلطه لذيذة وتنفع مع المشويات ..

المقادير ..
- بصله حمرا ..
- حبتين طماطم ..
- خياره ..
- حفنة زعتر طازج ..
- 2 ملعقة صغيرة سماق ..
- 3 ملاعق طعام عصير ليمون ..
- 5 ملاعق طعام زيت زيتون ..
- ملح وفلفل أسود حسب الرغبه ..


الطريقة ..
- يقطع البصل شرايح .. وينقع في تتبيلة السلطه (عصير الليمون .. زيت الزيتون .. السماق .. الملح .. الفلفل الاسود) ..
- تطقع باقي مكونات السلطه وتخلط مع البصل ..


بالنسبه للزعتر هذا شكله