اسلوب يديد ومختلف للربيان المقلي .. بصراحه اسهل من ان الواحد يقلي الربيان بالحبه .. وشكله حلو في التقديم ..
المقادير ..
(الكمية تكفي من 4 إلى 5 أشخاص)
- 2 كيلو ربيان من الحجم المتوسط
- 1 ملعقة طعام بابريكا
- 1 ملعقة طعام بصل مطحون (بودرة)
- 1 ملعقة صغيرة ثوم مطحون (بودرة)
- 1 ملعقة صغيرة كزبرة مطحونة
- 1 ملعقة صغيرة كمون مطحون
- نص ملعقة صغيرة فلفل أسود
- 1 ونص ملعقة صغيرة ملح أو حسب الرغبة
- فلفل حار مطحون حسب الرغبة
- عصير 4 ليمونات
- طحين لتغطية الربيان
الطريقة ..
- يتقشر الربيان ويتنظف وينشال الخيط الاسود وينغسل بالملح والطحين والماي عشان تروح الزفورة .. بعدها نغسله عدل من الطحين والملح ونخليه بتصفا من الماي عدل ..
- بعدها نخلط كل مكونات اللتبيله في مله .. طبعاً ماعدا الطحين .. ونحط الربيان في الخلطه ونخليه يتشرب عدل الخلطه .. تقريباً ساعه في الثلاجه ..
- نشك الربيان في الاسياخ الخشب ونغطيه بالطحين ونتخلص من الطحين الزياده .. ونحمره في الزيت ..
بالنسبه للعيش (الرز) ..
المقادير ..
- كوب ونص عيش
- جزرة مقطعه مكعبات (نص كوب تقريباً)
- ربع (نص كوب) بازيلا مجمده
- بصلة كبيرة مقطعه شرائح
- 1 ونص ملعقة صغيرة ملح أو حسب الرغبة
- زبدة وزيت
- نص ملعقة صغيرة فلفل أسود
الطريقة ..
- نسوي البازيلا والجزر في سوية ماي فيه شوية ملح
- نحمر البصل في شوية زبدة وزيت وبعدها نصيف عليه البازيلا والجزر والماي اللازم لتسوية العيش والملح والفلفل الاسود والعيش ونخليه لحد مايستوي ..
ملاحظه:
بالنسبه لكمية ماي العيش .. البسمتي بالعاده ياخذ كوب ونص ماي اذا كان العيش متنقع بعد الغسيل وكويسن اذا مانغسل (الكوب اللي تعاير فيه العيش نفسه للماي)
1 التعليقات:
السلام عليم..
مشكورة اختي على الوصفة.. ان شالله بسويها في اقرب فرصة و بعطيج رايي فيها بعد ..
حلوة فكرة الربيان في الاسياخ و وايد اسهل من ان نسوي كل ربيانة بروحها.. و تقديمج ما شالله وايد حلو بعد..
مجهوووول
إرسال تعليق